25 ANOS

Van alá 25 anos dende que por primeira vez se abriu o Instituto que hoxe se chama IES Praia Barraña, daquela corría o ano 1983 e Boiro era unha vila que estaba medrando, aínda que non tiñamos moitos sitios para o ocio nin moitos medios (máis ben ningún), pero por fin chegou a ensinanza do bacharelato; lembrareino sempre aquel día parecía coma calquera outro pero ese día tiña algo, un non sei que, nin como explicalo.

Todos eramos adolescentes, uns máis novos que outros pois os que estaban estudiando en Riveira e noutros lugares voltaron a Boiro para rematar o bacharelato.
A inauguración foi a toda presa, pois tiña que comezar o curso escolar con toda normalidade, e así foi, aínda que durante o primeiro ano convivimos con obreiros, con cemento, con po e con moitas deficiencias e necesidades.
Non tiñamos biblioteca, era un luxo, non tiñamos laboratorios, nin ximnasio, nin cafetería, nin había señora da limpeza, nunha palabra tiñamos todo iso pero non equipado, todo o espazo que queríamos pero bacío, o que si tiñamos era os profesores e a Juanjo, o conserxe.
Todo era rebulir de sangue nova e con moitas ganas de aprender novas cousas, de mellorar aquel centro no que careciamos das instalacións básicas, pero algo do que nunca me esquecerei era a ilusión e as gañas con que facíamos todo, a imaxinación axudaba a paliar todas as carencias.
Foron uns anos nos que pouco a pouco ese centro foi medrando, máis alumnos, máis profesores e as carencias foron diminuíndo pero aínda quedaba moito que mellorar.
Este día foi de novo un rebulir de sangue non tan nova, pero coa mesma ilusión que daquela, sorprendémonos coas novas instalacións, parece incrible o que se pode mellorar en 25 anos, aínda que supoño que se debería mellorar moito máis, é certo tamén chegou a ESO e puxo todo patas arriba e imaxino que os que comezaron a ESO neste centro tamén terían que enfrontarse a novas situacións e adversidades que co tempo se irían superando. Dende logo nos superámolas e imaxino que todos farán o mesmo.
Hoxe non é máis que unha lembranza daqueles anos da adolescencia, daquel centro e das súas xentes, é coma unha pequena historia pensando en todos os que por alí pasaron, alumnos, profesores, persoal non docente.
E lembrade todos, que os profesores non só dan información, tamén nos forman e seguen a formar as novas xeracións, lembrade que os valores que se aprenden nunca debedes de esquecelos, logo xa virá a universidade para incrementalos e afirmalos.

Por último dicir unha vez máis, os que leades isto, aportade algo, seguro que tedes lembranzas que compartir con todos, seguro que nalgún lugar tedes fotos, estou totalmente segura de que é así, non vos esquezades mandádeo o correo electrónico e saíra publicado. Tamén me gustaría que aquí participasen todas as promocións coas súas lembranzas, así todos nos enteraremos do que facían nosos irmáns ou os nosos fillos, e poderemos rir todos xuntos, que iso, amigos meus é a vida, é unha comedia que da moitas voltas e ás veces convertese nun drama, pero a comedia volta de novo se a chamamos.

Saúdos a todos, e non vos aburrades, así que a comentar.
Lembro o correo electrónico: 25aniversarioiespraiabarrana@gmail.com


Agora un vídeo, espero que me digades quen canta e sobre todo o título do tema, que eu non me lembro.